Serikali kuipa ushirikiano Dubai....soma habari kamili na matukio360...#share

Na Mwandishi Wetu

SERIKALI imesema itahakikisha inatoa ushirikiano kwa Shirika la Ndege la Dubai (Fly Dubai), ili lifanye kazi zake vizuri za utoaji wa huduma za usafiri wa anga hapa nchini.

Waziri wa Ujenzi, Uchukuzi na Mawasiliano, Prof. Makame Mbarawa (wa pili kulia), Mkuu wa Mkoa wa Kilimanjaro, Anna Mgwira (kulia), Makamu wa Rais Uendeshaji Biashara wa Shirika la Ndege la FlyDubai, Sudhir Sreedharan (wa pili kushoto), wakikata keki kuashiria uzinduzi rasmi wa safari za Ndege za Shirika hilo katika Uwanja wa Ndege wa Kimataifa wa Kilimanjaro (KIA), Mkoani Kilimanjaro.

Akizungumza leo mkoani Kilimanjaro katika uzinduzi wa safari za ndege kutoka Uwanja wa ndege wa Kilimanjaro (KIA) kuelekea nchini Dubai, Waziri wa Ujenzi, Uchukuzi na Mawasiliano, Profesa Makame Mbarawa, amesema uzinduzi wa safari hizo utakuza sekta ya utalii na biashara mkoani humo na nchi kwa ujumla.

"Naamini kupitia uzinduzi huu uchumi wetu utakua kwani wafanyabiashara na watalii kutoka nchi mbalimbali wataweza kuongezeka zaidi sababu wamesogezewa huduma za usafiri wa ndege za kimataifa katika viwanja vya ndege vikubwa nchini", amesema Waziri Prof. Mbarawa.

Profesa Mbarawa ameuhakikishia uongozi wa shirika hilo la ndege kuwa hawatojutia uamuzi wao wa kuamua kusogeza huduma zao za usafiri katika uwanja huo kwani wafanyabiashara wengi na wananchi kutoka sehemu mbalimbali wamekuwa wakitumia uwanja huo.

Kwa upande wake Makamu wa Rais wa Shirika la ndege la Dubai, Sudhir Sreedharan, amesema  kutokana na umuhimu na ubora wa uwanja huo wameamua kusogeza huduma zao kutokana na kuamini kuwa wageni wengi wa kimataifa wamekuwa wakitumia uwanja huo kwenda sehemu mbalimbali za vivutio vya utalii mkoani humo na mikoa ya jirani ya Arusha na Manyara.

"Kuna mambo mengi yametuvutia kuanzisha safari zetu katika uwanja huu, tunaamini hata soko letu la biashara litafanikiwa kwa kuongeza huduma hapa", amefafanua Makamu wa Rais.

Shirika la ndege la Dubai, sasa litatoa huduma za usafiri wa anga katika viwanja vya ndege vitatu kikiwemo kilichozinduliwa leo cha KIA na vile viwanja viwili vya ndege vya Mwalimu Julius Nyerere (JNIA) na Uwanja wa ndege wa Zanzibar vilivyokuwa awali.