Uamuzi kesi vigogo wa MSD Januari...soma habari kamili na matukio360...#share

Na mwandishi wetu,Dar es salaam
Mahakama  ya Hakimu Mkazi  Kisutu Januari 29,2018 inatarajia kutoa uamuzi iwapo vigogo  wa Bohari Kuu ya Dawa (MSD) wanaokabiliwa kesi ya vipimo feki vya kupimia Ukimwi  kama wana kesi ya  kujibu ama la.

Uamuzi huo unatarajiwa kutolewa siku hiyo na Hakimu Mkazi Mwandamizi,VictoriaNongwa.

Ni baada ya Mashahidi watatu wa upande wa mashtaka kutoka ushahidi wao na kuufunga.

Upande wa mashtaka katika kesi hiyo unawakilishwa na wakili wa Takukuru,  Vitalis Peter  huku utetezi ukiwakilishwa na wakili Makali Masatu.

Washtakiwa wanaokabiliwa  na kesi hiyo ni aliyekuwa Mkurugenzi wa Oparesheni Kanda ya Kaskazini wa MSD,  Sylivester Matandiko , Naibu Mkurugenzi Mkuu wa MSD, ambaye pia ni Meneja wa Viwango, Sadiki Materu na Wasajili kutoka Bodi ya Maabara Binafsi ya Afya Zainabu Mfaume na Joseph Nchimbi.

Katika kesi hiyo, washtakiwa hao wanakabiliwa na mashtaka saba ya kutumia madaraka vibaya na kuisabishia hasara serikali ya  zaidi ya Sh 3bilioni kwa kuruhusu uingizaji wa vipimo  feki vya kupimia  HIV.

Kwa pamoja wanadaiwa kutenda makosa hayo kati ya Januari 20 na Julai 20, 2012, walikula njama ya kutenda makosa hayo na  kutumia madaraka yao vibaya kinyume cha sheria ya kuzuia na kupambana na rushwa.