Kesi mhasibu wa Takukuru kuunguruma leo...soma habari kamili na matukio360..#share

Na Abdulrahim Sadiki

KESI inayomkabili mhasibu  mkuu wa TAKUKURU,  Godfrey Gugai anayedaiwa kuwa na utajiri wa kutisha kwa kumiliki mali zenye thamani ya sh. bilioni tatu ambazo haziendani na kipato chake, inaendelea leo  katika mahakama ya hakimu kazi Kisutu, jijini Dar es Salaam.

Godfrey Gugai

Kabla ya leo, upelelezi wa kesi hiyo ulikuwa bado haujakamilika.

Wakili wa Serikali Mkuu, Vitalis Peter alidai hayo mbele ya Hakimu Mkazi Mkuu, Thomas Simba, wakati shauri hilo linalomkabili Gugai na wenzake watatu lilipopelekwa kwa kutajwa.

Hata hivyo, Wakili wa utetezi, Alex Mgongolwa aliomba upande wa jamhuri watoe maelezo ambayo yataeleza lini upelelezi utakamilika ambapo upande wao utajua siku ya kuanza kwa usikilizwaji wa shauri hilo.

Akijibu hoja hiyo, Wakili wa Serikali Peter alidai kukamilika kwa upelelezi ni hatua, hivyo hawawezi kueleza kwa asilimia ngapi ila bado unaendelea na wako katika hatua nzuri.

Wakili huyo alidai tarehe ya leo wataeleza hatua ya upelelezi ilipofikiwa.

Mbali na Gugai, washitakiwa wengine katika kesi hiyo ni George Makaranga, Leonard Aloys na Yasini Katera.

Washitakiwa hao wanaokabiliwa na mashitaka 43 yakiwemo 20 ya utakatishaji fedha haramu, kumiliki mali zisizoendana na kipato na kughushi mikataba ya mauziano ya viwanja katika maeneo mbalimbali.

Gugai na wenzake wanasota mahabusu kutokana na kukabiliwa na mashitaka ya utakatishaji fedha ambayo hayana dhamana kwa mujibu wa sheria.

Katika mashitaka hayo, shitaka la kwanza ni la kumiliki mali ambazo hazina maelezo ambalo linamkabili Gugai  anayedaiwa kati ya Januari 2005 na Desemba 2015, mkoa wa Dar es Salaam, akiwa ofisa wa umma ameajiriwa na TAKUKURU anamiliki mali zenye thamani ya sh. 3,634,961,105.02 ambazo haziendani na kipato chake cha sasa wala cha nyuma cha sh. 852,183,160.46 na alipotakiwa kutoa maelezo alishindwa kuyatoa juu ya mali hizo zilizoko kwenye umiliki wake.