Kesi ya Kitilya wenzake mambo magumu..soma habari kamili na Matukio360..#share

Na mwandishi wetu

Mwenyekiti wa Kampuni inayoshughulikia  uwekezaji wa mitaji na dhamana (Egma), Harry Msamire Kitilya na waliokuwa maofisa wa benki ya Stanbic, Shose Mori Sinare na Sioi Graham Solomon wanaendelea kusota rumande kutokana na upelelezi wa kesi inayowakabili bado haujakamilika.

Harry Msamire Kitilya katikati na waliokuwa maofisa wa benki ya Stanbic, Shose Mori Sinare kulia na Sioi Graham Solomon kushoto

Leo wakili wa Serikali, Esterzia Wilson  amedai mbele ya Hakimu Mkazi Mkuu, Huruma Shaidi  kuwa upelelezi wa kesi hiyo bado haujakamilika.

Pia amedai kuwa bado wanasubiri awamu ya pili ya upelelezi kutoka nchini Uingereza. Hivyo  akaomba kesi hiyo ipangiwe tarehe nyingine kwa ajili  ya kutajwa.

Hakimu Shaidi ameahirisha kesi hiyo  hadi Novemba 3,2017 kwa ajili ya kutajwa ili kuangalia kama upelelezi utakuwa umekamilika ama la.

Kesi hiyo inasikilizwa na Hakimu Mfawidhi wa mahakama hiyo, Cyprian Mkeha.

Awamu ya kwanza ya vielelezo hivyo  kutoka nchini Uingereza  vimekwisha pokelewa na kwamba bado wanasubiri awamu ya pili.

Washtakiwa hao wanakabiliwa na mashtaka ya kula njama, kujipatia fedha kwa njia ya udanganyifu na kutakatisha fedha.

Wanadaiwa kutenda makosa hayo kati ya Machi 2013 na Septemba 2015 wakati wa mchakato wa mkopo wa dola za Marekani 550 milioni  kwa  serikali ya Tanzania kutoka Benki ya Standard Uingereza.

Wanadaiwa kuwa  Machi 2013 jijini Dar es Salaam walijipatia Dola za Marekani 6 milioni, wakionyesha kuwa fedha hizo zilikuwa ni malipo ya ada ya uwezeshaji upatikanaji wa mkopo  na zililipwa kupitia  Kampuni ya Egma T Ltd.

Washtakiwa  hao wanadaiwa  kutakatisha fedha kwa kuhamisha, kuchukua na kuweka kiasi cha Dola za Marekani 6 milioni katika akaunti tofauti tofauti  za benki.

Kati ya  Machi 2013 na Septemba 2015, wanadaiwa  kuwa waliweka pesa hizo katika akaunti mbalimbali zilizomilikiwa na kampuni ya Egma na kwamba walipaswa kufahamu kuwa pesa hizo ni mazao ya uhalifu wa kughushi.