Madabida, wenzake kusomewa mashtaka ya awali mwezi Machi....soma habari kamili na matukio360....#share

Na mwandishi wetu, Dar es salaam

Mahakama ya Hakimu Mkazi Kisutu Machi 16,2018 itamsomea maelezo ya awali (PH) aliyekuwa Mwenyekiti wa CCM Mkoa wa Dar es Salaam, Ramadhani Madabida na wenzake watano.

Madabida akiwa katika mahakama ya hakimu mkazi Kisutu

Maelezo hayo ya awali yanatarajiwa kusomwa siku hiyo na  Wakili wa Serikali, Shedrack Kimaro  mbele ya Hakimu Mfawidhi, Victoria Nongwa.

Madabida na wenzake wanakabiliwa na mashtaka  mawili ni ya kusambaza dawa bandia za kufubaza makali ya Ukimwi, kujipatia fedha kwa njia ya udanganyifu, uzembe wa kuzuia kosa kutendeka na kusababisha hasara. 

Mbali na Madabida  ambaye ni afisa mtendaji mkuu, washtakiwa wengine ni Seif Shamte ambaye ni mkurugenzi  wa uendeshaji,  Simon Msoffe meneja masoko na  Fatma Shango mhasibu msaidizi wote wa Tanzania Pharmaceutical Industries Ltd. Pamoja na Sadick Materu na Evans Mwemezi ambao ni maofisa wa Bohari Kuu ya Dawa.  

 Madabida,  Seif, Simon na  Fatma  wanadaiwa kuwa Aprili 5, 2011 jijini Dar es Salaam waliisambazia Bohari Kuu makopo 7776 ya  dawa bandia za ARV’s zenye mchanganyiko wa dawa ya stavudin 30mg +nevirapine 200mg+lamivudine 150mg.

Dawa hizo zilizotengenezwa Machi 2011 na kuisha muda wake wa matumizi Februari 2013 huku zikionyesha kuwa ni halali wakati si kweli.Washtakiwa hao wanadaiwa pia  kuisambazia Bohari Kuu ya Dawa (MSD) kopo 4476 .

Wanaaendelea kudaiwa kuwa walijipatia  Dola za Marekani 98,506.08  ambazo ni sawa na Sh 148,350,156 za Tanzania kwa udanganyifu baada ya kuonyesha kwamba fedha hizo ni malipo ya jumla ya makopo 12252 ya dawa hizo za ARV’s.

Kwa upande wa Washtakiwa  Sadick Materu na Evans Mwemezi  wao wanadaiwa kuwa  kati ya Aprili 5 na 13 mwaka 2011 wakiwa maafisa wa Bohari Kuu ya Dawa walishindwa kuzuia kosa kutendekea.

Washtakiwa  hao wote, wanadaiwa katika kipindi hicho walishindwa kutimiza wajibu na kuisababishia MSD  hasara ya Sh 148,350,156.48 kwa kusambaza dawa hizo bandia za kufubaza makali ya Ukimwi.

Baada ya kusomewa mashtaka hayo washtakiwa hao walikana na wapo nje kwa dhamana