Mahakama yampa DPP siku 14....soma habari kamili na matukio360...#share

Na mwandishi wetu, Dar es salaam

MAHAKAMA ya Hakimu Mkazi Kisutu imeutaka upande wa mashtaka ndani ya siku 14 kuja na maamuzi ni lini Mkurugenzi wa Mashtaka (DPP) ataendelea na  kesi ya Uhujumu Uchumi na kuisababishia Serikali hasara ya bilion  2.4  inayomkabili Mkurugenzi wa Tathmini ya Madini nchini,  Archard Kalugendo na mwenzake.

Archard Kalugendo wa mbele kulia  Edward Rweyemamu kushoto wakiwa katika mahakama ya Hakimu Mkazi Kisutu

Hakimu Respicius Mwijage alisema hayo baada ya wakili wa serikali Elizabeth Nkule kudai kuwa upelelezi wa kesi hiyo umekamilika na jalada lipo kwa DPP baada ya kukamilisha maelekezo waliyopewa na kuomba tarehe nyingine ya kutajwa.

Wakili wa utetezi Ludovic Nickson alidai kuwa jamhuri wanaleta hoja hiyo zaidi ya mara tatu katika tarehe tofauti Novemba 9,2017, Januar 3,2018 na Januari 17,2018.

"Tunachosubiri ni upelelezi kukamilika na kesi kusikilizwa kati ya Kisutu au Mahakama kuu na tunataka kufahamu DPP anachukua muda gani kukamilisha upelelezi"alidai

Alidai kama DPP bado anakazi nyingi awaruhusu watuhumiwa kuomba dhamana wakati anaendelea na shughuli zake ili watuhumiwa wawe nje.

Mshtakiwa mwingine ni  Mthamini wa Madini ya Almasi wa Serikali, Edward Rweyemamu na wote wanakabiliwa na shtaka  hilo.

Kesi hiyo imeahirishwa hadi Machi,12,2018 kwaajili ya kutajwa

Inadaiwa kuwa kati ya Agosti 25 na 31, 2017  katika maeneo mbalimbali kati ya Dar es Salaam na Shinyanga, kwa pamoja na kwa vitendo vyao wakiwa wathamini  wa Madini waliisababishia hasara Serikali kiasi hicho cha fedha.