Upelelezi mauaji ya mkurugenzi bado haujakamilika.....soma habari kamili na matukio360....#share

Na mwandishi wetu Dar es Salaam.

UPELELEZI wa kesi ya mauji ya Mkurugenzi na Mwanzilishi mwenza wa shirika lisilo la kiserikali la Palms Foundation, Wayne Lotter inayowakabili washtakiwa saba katika Mahakama ya Hakimu Mkazi Kisutu bado haujakamilika.

Hayo yameelezwa jana na wakili wa Serikali, Adolf Mkini kwa Hakimu Mkazi Mkuu Wilbard Mashauri wakati kesi hiyo ilipotajwa.

Hata hivyo mahakama ilielezwa na mshtakiwa Rahma Almas  kuwa mshtakiwa 

Mohammed Maganga anaumwa.

Wakili Mkini aliieleza Mahakama kuwa kesi ilipangwa kwa ajili ya kutajwa, upelelezi wake  bado haujakamilika.

Baada ya kutolewa kwa maelezo hayo, Hakimu Mashauri aliiahirisha kesi hadi Machi 21,2018 kwa ajili ya kuitaja ili kuangalia kama upelelezi utakuwa umekamilika ama la.

Washtakiwa wanakabiliwa na kesi hiyo ni raia wa Burundi, Nduimana Jonas maarufu Mchungaji (40) Mkazi wa Kamenge Burundi na Mfanyabiashara Godfrey Salamba (42) Mkazi wa Kinondoni Msisiri A.

Wengine ni Mfanyabiashara Inocent Kimaro (23) Mkazi wa Temeke Mikoroshini, Mfanyabiashara Chambie Ally(32) Mkazi wa Kia/Boma na Ofisa wa Benki ya NBC, Robert Mwaipyana (31) Mkazi wa Temeke Mikoroshini.

Washtakiwa hao wanakabiliwa na mashtaka mawili ambapo katika shtaka la kwanza wanadaiwa kuwa kati ya Julai Mosi na Agosti 16,2017 wakiwa ndani ya Jamhuri ya Muungano wa Tanzania washtakiwa hao na wenzake watatu walikula njama ya kufanya mauaji ya Wayne Lotter.

Katika shtaka la pili, washtakiwa hao wanakabiliwa na shtaka la mauaji ambapo wanadaiwa kutenda kosa hilo Agosti 16, 2017 katika makutano ya barabara za Chole na Haile Selasie Kinondoni DSM,  walimuua Lotter.

Washtakiwa hao, wameunganishwa na washtakiwa watatu waliokuwa wanakabiliwa na kesi hiyo awali ambapo kesi yao ipo katika hatua ya kutajwa kwa sababu upelelezi wake bado haujakamilika.

Washtakiwa hao ni  Meneja wa Benki ya Baclays Khalid Mwinyi (33) Mkazi wa Mikocheni B, Mfanyabiashara Rahma Almas (37) Mkazi wa Mbagala B na Mohammed   Maganga (61) mchimba makaburi.