eLECTION nEWS: Mfahamu Diane Rwigara,.. mgombea wa kike wa Urais Rwanda 'anaemtikisa' Rais Kagame Uchaguzi Mkuu unaofanyika leo 04/08/2017

Leo Agosti 4, 2017 wananchi wa Rwanda wanapiga kura

kumchagua Rais wa nchi hiyo. Wataamua kumchagua

aidha Rais aliyepo madarakani Paul Kagame, au

wapinzani wake Frank Habineza na Philippe Mpayima.

Wachambuzi wa siasa wanataraji kuwa Kagame ataibuka

na ushindi mkubwa katika uchaguzi huo. Hata hivyo, kuna

'sintofahamu' inayotokana na Katiba ya nchi hiyo

kubadilishwa mwaka juzi ili kumwezesha kiongozi huyo

kugombea muhula wa tatu, baada ya mihula miwili ya

miaka mitano kila mmoja.

Uchaguzi huo unaangalia kwa karibu na wafuatiliaji wenye

hofu kuhusu mmomonyoko wa demokrasia nchini humo.

Japo hofu hiyo inaweza kuwa ya msingi, lakini ni muhimu

iendane na ukweli kuhusu historia na maendeleo ya

kiuchumi ya nchi hiyo.

Rwanda inaweza kuelezwa kama demokrasia isiyo ya

kiliberali - 'demokrasia kipande,' 'demokrasia yenye

ombwe,' mfumo wa utawala ambao japo unaruhusu

chaguzi kufanyika, wananchi wananyimwa uelewa kuhusu

walioshika hatamu za utawala, kwa kunyimwa haki za

kiraia.

Hata hivyo, demokrasia hiyo isiyo ya kiliberali haipaswi

kugubika mafanikio makubwa chini ya utawala wa

Kagame, ambapo mwaka hadi mwaka, Rwanda imekuwa

ikipiga hatua kubwa kiuchumi. Kwa sifa hiyo tu, inatosha

kabisa kumfanya Kagame aibuke mshindi kwenye

uchaguzi.

Sasa tuwaangalie kwa kifupi wagombea urais katika

uchaguzi huo:

Kagame ni mgombea kwa tiketi ya chama tawala,

Rwandan Patriotic Front (PRF). Aliongoza waasi

waliofanikiwa kukomesha mauaji ya kimbari dhidi ya

Watutsi mwaka 1994. Kisha akawa Makamu wa Rais, na

mwaka 2000 akawa Rais katika serikali ya mpito.

Alichaguliwa kuwa Rais mwaka 2003, na akachaguliwa

tena mwaka 2010. Japo anaonekana kuwa maarufu, kuna

mgawanyiko mkubwa wa kimtazamo dhidi ya Kagame.

Kuna wanaomwona Kagame kama kiongozi wa kuigwa na

utawala wake mfano wa kupigiwa mstari, kwa kuzingatia

mafanikio makubwa katika ukuaji wa uchumi wanchi hiyo,

jitihada thabiti za kupunguza umasikini, mafanikio katika

sekta ya afya, kudhibiti rushwa, na kudumisha amani.

Mwaka juzi, Wanyarwanda walipiga kura kwa wingi

kuunga mkono Kagame aongoze nchi hiyo hadi mwaka

2034.

Lakini licha ya sifa hizo nzuri, kuna wanaomwona Kagame

kama mfano hai wa dikteta. Analaumiwa kwa kubana mno

fursa za kisiasa nchini Rwanda.

Mashirika ya kimataifa ya haki za binadamu kama vile

Human Rights Watch na Amnesty International

yamemshutumu Kagame kwa kujenga mazingira ya kutia

hofu kwa mashambulizi dhidi ya wapinzani wake kisiasa,

wanatetezi wa haki za binadamu.

Frank Habineza ni kiongozi wa chama cha Deomcratic

Green Party of Rwanda kilichoanzishwa mwaka 2009

lakini kikazuiwa kusajiliwa hadi mwaka 2013. Mwaka

2010, Habineza alilazimika kukimbilia mafichoni kufuatia

kuuawa kwa Naibu wake, Andre Kagwa Rwisereka, lakini

akarejea nchini Rwanda mwaka 2012.

Habineza anatoa mbadala wa sera zilizoanzishwa na RPF,

ambazo anasema zimekuwa mzigo kwa Wanyarwanda.

Hizo ni pamoja na upanuzi mkubwa wa mazao na ardhi,

sambamba na umiliki wa ardhi na sera zinazoruhusu

utaifishaji wa ardhi kwa ajili ya matumizi ya umma.

Kwa upande wake, Philippe Mpayimana ni mgombea huru

asiye na rekodi yoyote ya kisiasa. Mwandishi wa habari

mstaafu, Philippe ameandika vitabu kadhaa kuhusu

mwenendo wa kisiasa na kijamii. Alikuwa akiishi

uhamishoni tangu 1994 hadi mapema mwaka huu.

Mpayimana anasema kwamba dhamira yake kuu ni

kuibadili Rwanda na kuwa nchi yenye demokrasia kamili.

Pamoja na mambo mengine, ameahidi kuimarisha taasisi

za demokrasia.