Lissu leo amafika Mahakamani Kisutu kwa kesi ya Dikteta 'Uchwara'...Mvutano mkali wa kisheria watokea baina ya mawakili wa serikali na wa Lissu...Hakimu aahirisha kesi na kutoa siku 14....#share

RAIS wa Chama cha Mawakili wa Tanganyika (TLS) na Mwanasheria Mkuu wa Chama cha Demokrasia na Maendeleo (Chadema) Tundu Lissu leo amefika mahakamani Kisutu kwenye kesi inayomkabili ya  ‘Dikteta Uchwara.

Aidha mara tu baada ya kufika mahakamani hapo upande wa mashtaka umeieleza Mahakama ya Hakimu Mkazi Kisutu kuwa imefunga ushahidi katika kesi ya hiyo ya Lissu.

Mutalemwa Kishenyi ambaye ni wakili wa serikali amemueleza Hakimu Mkazi Mkuu, Godfrey Mwambapa kuwa kesi hiyo imeitishwa kwa ajili ya ushahidi lakini wamemaliza ushahidi.

Baada ya kueleza hayo, Lissu amesema wakili wake Peter Kibatala hayupo, isipokuwa anawasilisha hoja kwamba hana kesi ya kujibu. Hata hivyo, wakili Kishenyi amedai kuwa hakuna kipengele kinachoruhusu mshtakiwa kusema hana kesi ya kujibu ama lah.

Kutokana na hatua hiyo, Lissu amedai kuwa hoja za upande wa mashtaka sio sahihi, kwa sababu kifungu cha 230 cha Mwenendo wa Makosa ya Jinai kinatoa nafasi kueleza kama kuna kesi ya kujibu ama hakuna.

“Hivyo tunaomba tupate fursa kwamba kwa ushahidi uliopo katika recodi hakuna kesi ya kujibu,” amesema Lissu.

Hata hivyo, wakili Kishenyi amesema kwa kusisitiza kuwa hakuna kifungu cha namna hiyo, hivyo mahakama itoe uamuzi kama ana kesi ya kujibu ama lah.

Kutokana na mvutano huo, Hakimu Mwambapa amesema anakubaliana na hoja za upande wa mashtaka kwamba hakuna kifungu kinachomruhusu mshtakiwa kueleza kama ana kesi ya kujibu ama lah, isipokuwa ana haki ya kuieleza mahakama.

Hakimu Mwambapa amesema anatoa siku 14 kwa pande zote mbili kuwasilisha hoja zao September 18/2017 na October 4/2017 atatoa uamuzi kama mshtakiwa ana kesi ya kujibu ama hana.

Na Mwandishi Wetu