Kesi kigogo TRA anayemiliki gari 19 kuunguruma... soma habari kamili na Matukio360..#share

Na Abdulrahim Sadiki

AfFISA Msaidizi wa Forodha wa Mamlaka ya Mapato Tanzania (TRA), Jennifer Mushi anayekabiliwa na mashtaka mawili ikiwamo la kukutwa akimiliki magari 19,  mali isiyolingana na kipato chake halali katika Mahakama ya Hakimu Mkazi Kisutu, atasomewa maelezo ya awali Desemba 6, 2017.

Jennifer ameshtakiwa chini ya kifungu cha 27, (1) (a) na (b) cha sheria ya kuzuia na kupambana na rushwa namba 11ya mwaka 2007.

Alipaswa kusomewa maelezo hayo ya awali leo lakini Wakili wa Serikali Mkuu, Vitalis Peter ameieleza mahakama kuwa bado hawajamaliza kuandaa maelezo.

Hakimu Shaidi ameaihirisha kesi hiyo hadi Desemba 6,2017 ambapo mshtakiwa huyo atasomewa maelezo hayo ya awali (PH).

Mshtakiwa huyo anayetetewa na wakili Elisaria Mosha anadaiwa kuwa  kati ya Machi 21,2016 na Juni 30,2016  jijini Dar es Salaam  akiwa  mwajiriwa wa TRA kama Afisa Forodha Msaidizi alikutwa akimili magari 19.

Magari hayo ni Toyota Dyna Truck, Toyota Vizt,  Toyota RAV4, Suzuki Carry, Toyota Ipsum, Toyota Wish, Toyota Mark II, Toyota Wish na  Toyota Mark X.

Mengine ni Toyota Estima Toyota Regiusage, Toyota Estimated, Toyota Alex, Toyota Noah, Toyota Crown,  Toyota Hiace, , Toyota Passo na Suzuki Carry yote yakiwa na thamani ya Sh 197,601,207 Mali ambayo hailingani na kipato chake halali.

Anadaiwa kuwa, kati ya Machi  21 ,2012 na  Machi 30,2016 Dares Salaam akiwa mwajiriwa wa TRA kama Afisa Forodha Msaidizi alikutwa akiishi maisha ya kifahari  yenye thamani ya Sh 333,255,556.24 fedha ambayo hailingani na Kipato chake halali.

Baada ya kusomewa mashtaka hayo mshtakiwa huyo alikana na yupo nje kwa dhamana.