NEC kutangaza uchaguzi majimbo mawili, kata tano zilizo wazi...soma habari kamili na Matukio360..#share

Na mwandishi wetu
TUME ya taifa ya uchaguzi(Nec) imepokea taarifa rasmi ya kuwapo kwa majimbo mawili na kata tano zilizowazi kufuatia wabunge na madiwani kujiuzulu na wengine uteuzi wao kutenguliwa na mahakama.

Watendaji wa kuu wa NEC wakipitia baadhi ya nyaraka kuhusu uchaguzi

Kufuatia hali hiyo NEC inatarajia kutangaza marudio ya uchaguzi mdogo katika majimbo  na kata hizo

Soma taarifa kamili 

Tume ya Taifa ya Uchaguzi imepokea taarifa kutoka kwa Mhe. Spika wa Bunge la Jamhuri ya Muungano wa Tanzania akiitaarifu kuwepo kwa nafasi wazi ya Ubunge katika Jimbo la Singida Kaskazini kufuatia Ndugu Lazaro Samwel Nyalandu kuvuliwa Uanachama wa Chama cha Mapinduzi (CCM) na hivyo kupoteza sifa ya kuwa Mbunge. 

Aidha, kwa mujibu kifungu cha 113(1) cha Sheria ya Taifa ya Uchaguzi, Sura ya 343, Tume imepokea Hati ya Mahakama Kuu ya Tanzania ikithibitisha uamuzi wa Mahakama hiyo juu ya kutengua matokeo ya Uchaguzi wa Mbunge wa Jimbo la Longido ambalo Ndugu Onesmo Ole Nangole alikuwa ni Mbunge.

Wakati huo huo Waziri mwenye dhamana ya Serikali za Mitaa kwa kutumia mamlaka aliyopewa chini ya kifungu cha 13(1) cha Sheria ya Uchaguzi ya Serikali za Mitaa, ameitaarifu Tume uwepo wa nafasi wazi za Madiwani katika Kata tano zilizopo katika Halmashauri mbalimbali.

Kwa kuzingatia masharti ya Sheria ya Taifa ya Uchaguzi Sheria ya Uchaguzi ya Serikali za Mitaa, Tume ya Taifa ya Uchaguzi itatoa ratiba ya Uchaguzi Mdogo wa kujaza nafasi wazi za Majimbo na Kata hizo hapo baadae.

Majimbo na Kata zilizo wazi ni kama ifuatavyo:-

Jedwali Na. 1: Majimbo yaliyowazi

NA.	MKOA	HALMASHAURI	JIMBO
1.	Singida	Halmashauri ya Wilaya ya Singida	Singida Kaskazini
2.	Arusha	Halmashauri ya Wilaya ya Longido	Longido

Jedwali Na. 2: Kata zilizowazi

NA.	MKOA	NA.	HALMASHAURI	NA.	KATA
1.	Kagera	1.	Halmashauri ya Wilaya ya Ngara.	1	Keza
2.	Arusha	2	Halmashauri ya Jiji la Arusha	2	Kimandolu
3.	Pwani	3.	Halmashauri ya Wilaya ya Kisarawe.	3	Kurui
4.	Tabora	4.	Halmashauri ya Wilaya ya Tabora	4	Bukumbi
5.	Tanga	5.	Halmashauri ya Wilaya ya Korogwe.	5	Kwagunda

Jaji (R) Semistocles S. Kaijage

MWENYEKITI

 TUME YA TAIFA YA UCHAGUZI

16 NOVEMBA, 2017