Saba wapandishwa kizimbani....soma habari kamili na matukio360...#share

Na mwandishi wetu, Dar es salaam

Watu saba akiwamo raia wa Zambia wamefikishwa katika Mahakama ya Hakimu Mkazi Kisutu wakikabiliwa na mashtaka matatu ya kula njama, wizi na utakatishaji wa fedha wa Sh milioni 120.5 

Akiwasomea hati ya mashtaka inayowakabili washtakiwa hao,Wakili wa Serikali Mwanaamina Kombakono jana  kwa Hakimu Mkazi Mkuu,Huruma Shaidi aliwataja washtakiwa hao kuwa ni  Robert Silaa (26) ambaye ni  wakala wa usafirishaji.

 Isihaka Ngubi (25) dereva, Cathbeth Mlugu (35) Mlinzi wa Zambia Cargo and Logistic Ltd, Mrisho Mindu karani, Giften John (32), Maulid Said (40) karani, Kirby Ng'andu Meneja Mwendeshaji wa kampuni ya Zambia Cargo and Logistic Ltd.

Wakili Kombakono alidai kuwa kati ya Januari Mosi,2018 na Februari 6,2018 katika kampuni ya Zambia Cargo and Logistic Ltd iliyopo Dar es Salaam washtakiwa hao walikula njama ya kutenda kosa la wizi.

Washtakiwa hao wanadaiwa kuwa katika kipindi hicho cha Januari Mosi na Februari 6,2018 washtakiwa hao waliiba katoni 700 za korosho zilizobanguliwa zenye thamani ya dola 54,180 sawa na Sh 120, 563,909.55 ambazo ni mali ya Barabara Trading Tanzania Limited.

Iliendea kudaiwa katika shtaka la utakatishaji fedha kuwa washtakiwa hao walijihusisha moja kwa moja na muamala wa katoni 700 za korosho zilizobanguliwa zenye thamani ya Sh 120,563,909.55 wakati wakijua mali hiyo ilikuwa ni zao la wizi.

Baada ya washtakiwa kusomewa mashtaka hayo yanayowakabili wote walikana na upande wa mashtaka alidai kuwa upelelezi bado haujakamilika.

Washtakiwa walipelekwa rumande kwa sababu shtaka la utakatishaji wa fedha kwa mujibu wa sheria halina dhamana.

Kesi imeahirishwa hadi Machi 9,2018 kwa ajili ya kutajwa ili kuangalia kama upelelezi utakuwa umekamilika ama la.