Dk. Rwakatare atunukiwa tuzo ya heshima...soma habari kamili na matukio360...#share

Na Abraham Ntambara, Dar es Salaam

MCHUNGAJI Kiongozi wa Kanisa la Mlima wa Moto la Assemlies of God Mikocheni B jijini Dar es Salaam Dk. Getrude Rwakatare ametunukiwa tuzo ya heshima na Shirika la Umoja wa Maaskofu na Wachungaji ulimwenguni.

Mchungaji Kiongozi wa Kanisa la Mlima wa Moto la Assemlies of God Mikocheni B jijini Dar es Salaam Dk. Getrude Rwakatare akiwa ameshika tuzo aliyokabidhiwa.

Tuzo hiyo imetolewa na Rais wa umoja huo Askofu Mkuu Steve Moore kutoka Washington D.C nchini Marekani na kukabidhiwa na Askofu Mkuu Professa Leonard Kuwas mwakilishi wa Afrika.

Akizungumza na waandishi wa habari jijini Dar es Salaam baada ya kukabidhiwa tuzo hiyo, Dk. Rwakatare amesema tuzo hiyo ameipata kutokana na utumishi wake bora kiroho na kijamii nchini.

“Leo ninayo furaha ya kipekee kwa kutunukiwa tuzo ya heshima kutokana na utumishi bora kiroho na kijamii katika nchi yangu ya Tanzania,” amesema Dk. Rwakatare.

“Tuzo hii imetokana na watu hawa kunifuatilia kwa miaka yote ya utumishi wangu  tangu nikisomea uchungaji nchini Marekani na niliporudi niliendelea kufanya shughuli za kiutumishi na kijamii,” ameongeza.

Dk. Rwakatare amesema katika kuhakikisha anatoa utumishi  wa kiroho na kijamii aliweza kuanzisha kanisa ambalo limeweza kuenea kwenye maeneo mbalimbali nchini pamoja na kuanzisha shule kwa ajili ya kuhudumia watoto kwenye masuala ya elimu.

Aidha amesema aliweza kuwasaidia akina mama katika masuala ya mikopo, misaada mbalimbali katika jamii na kuwasaidia wengine kuwainua kwa njia ya maombi.

Kwa kupata tuzo hiyo Dk. Rwakatare anakuwa mtu wa kwanza kwa nchi za ukanda wa Afrika Mashariki kutunukiwa.

“Ninayo furaha ya kusema kuwa mimi ni wa kwanza kupewa tuzo hii, kwa hiyo nina mshukuru Mungu,” amesema.

Aidha kwa kuchukua tuzo hiyo amechaguliwa kuwa mmoja wa sehemu ya kamati kuu ya ulimwengu mzima katika umoja huo.

Ameahidi kutumikia nafasi hiyo kwa uaminifu na atakuwa katika maombi kuombea viongozi wote.

Matukio katika picha.